Enwebiad ETO yn AIM Awards 2025!

Ynyr Roberts
Sep 20
2 min read

DATGANIAD I'R WASG:

POPETH YN DERBYN ENWEBIAD YNG NGWOBRAU CERDDORIAETH ANNIBYNNOL PRYDEINIG - AIM 2025

Mae’n bleser gan Recordiau Côsh gyhoeddi bod Popeth, project y cyfansoddwr a’r cynhyrchydd Ynyr Roberts, wedi’i enwebu ar gyfer y wobr ‘Gwobr PPL am yr Artist Annibynnol Newydd a Chwaraewyd Fwyaf’ eto eleni yng Ngwobrau AIM 2025.

Ymysg yr enwebiadau eleni gyda artistiaid fel Bon Iver, Fontaines D.C., Chloe Qisha, Ezra Collective a Wet Leg, bydd seremoni Gwobrau AIM 2025 yn cael ei chynnal yn y Roundhouse, Camden, Llundain ar Nos Fawrth 23ain o Fedi.

“Prosiect gyda phwyslais ar gydweithio i gynhyrchu cerddoriaeth pop Cymraeg i’r byd ydi Popeth!” meddai Ynyr. “Mae’n brosiect blaengar a chynhwysol sy’n cyfansoddi caneuon clwb/dawns ddisglair a hapus o fewn sin cerddorol cyffrous a llewyrchus yma yng Nghymru. Mae derbyn enwebiad arall ar gyfer Gwobr AIM yn golygu cymaint i mi, ar y cam cynnar hwn o daith Popeth, a gobeithio bydd y sylw yn creu cyfleoedd ar gyfer mwy o gydweithio a chyfansoddi cerddoriaeth newydd gyffrous yn y dyfodol.”

Ychwanega Ywain Gwynedd, sylfaenydd Recordiau Côsh: “Mae Popeth yn artist sy’n cynhyrchu alawon pop bachog. Mae’r rhan fwyaf o’r caneuon wedi rhoi cyfleoedd i artistiaid newydd ganu a serennu ar y traciau, gan ddefnyddio’r gân fel sylfaen i ddechrau gyrfa eu hunain fel artistiaid unigol. Mae’r ethos hwn o gydweithio, a rhoi cyfle i artistiaid eraill i leisio’r caneuon, wedi gwneud Popeth yn artist difyr i’w dilyn - rydyn ni’n edrych ymlaen at weld beth fydd yn digwydd nesa!”

Mae rhestr lawn Gwobrau AIM 2025 ar gael wrth GLICIO YMA.